Кирил Стојанов 
Македонскиот кошаркарски стручњак и еден од најдобрите тренери во младински категории, Саша Димитријевиќ повторно ја истакна важноста на тренерот. Истите треба да бидат стручни затоа што доколку не се постават основите децата потоа не може да напредуваат. Димитријевиќ истакна дека децата треба да работат со најдобрите тренери а не со најефтините или достапните.
Целиот статус на Димитријевиќ во продолжение:
СО ДЕЦАТА ТРЕБА ДА РАБОТАТ НАЈДОБРИТЕ ТРЕНЕРИ
(Не најевтините. Не „достапните“. Не оние што „имаат време“.)Работата со деца во спортот не е поедноставна верзија на работата со сениори. Таа е најсложената и најодговорната форма на тренерска работа. Во детската возраст се поставуваат темелите – моторички, технички, когнитивни и психолошки – врз кои подоцна се гради целиот спортски и човечки развој.
Тренерот кој работи со деца не смее да биде „почетник во струката“. Напротив, тој мора да поседува највисоко ниво на знаење, затоа што токму во овој период се формираат, правилните движења и навики, функционалната техника, односот кон тренингот и учењето, и перцепцијата за сопствениот потенцијал.
Лошо поставена основа во детството не се коригира лесно. Погрешна техника, механичко повторување без разбирање, рана специјализација и притисок за резултат создаваат „брзи победи“, но долгорочни последици: застој во развојот, повреди, ментален замор и напуштање на спортот.
Најдобрите тренери знаат дека развојот секогаш има предност пред резултатот. Тие не „произведуваат победници“ на 10 години, туку создаваат играчи способни да учат, да размислуваат и да напредуваат. Тие ги учат децата зошто нешто се прави, а не само како.
Работата со деца бара: педагошка и психолошка писменост, способност за индивидуален пристап, трпение, емпатија и јасна методологија, визија за долгорочен развој, а не краткорочна слика на табелата.
Да го дадеш детето на тренер значи да му го довериш неговиот спортски пат . Затоа, со децата треба да работат најдобрите, не затоа што е најлесно, туку затоа што е најважно.
Саша Димитријевиќ
https://www.facebook.com/share/p/1BivMXUKH3/
