НОВАК ЃОКОВИЌ СПАРИНГУВАШЕ СО МАКЕДОНЕЦ, ПРЕД ДУЕЛОТ ПРОТИВ ЈАНИК СИНЕР

Српскиот тенисер Новак Ѓоковиќ утре го очекува полуфиналниот меч на Австралија опен против Италијанецот Јаник Синер. Денеска, Ѓоковиќ одржа официјален тренинг пред утрешниот дуел, а спарингуваше со Македонецот Даниел Јовановски.

Јовановски е роден во Австралија и настапува под нивното знаме, но неговите корени се македонски. Оваа година стигна до второто коло на јуниорскиот Австралија Опен. Интересно е што на неговиот Инстаграм профил може да се забележат „сториња“ на македонски јазик, како и објави од профил посветен на Македонската православна црква („macedonianorthodox“).

Според информациите на СпортКлуб, Ѓоковиќ имал посебни барања за Јовановски, вклучувајќи „кик сервис“ и „сервис на Т линијата“.

Утрешното полуфинале против Јаник Синер започнува во 09:30, а Италијанецот го има совладано Ѓоковиќ на последните пет меѓусебни соочувања.