АМОРИМ СИ ОТИДЕ, НО КРИЗАТА ВО ЈУНАЈТЕД ПРОДОЛЖИ

Иако Рубен Аморим доби отказ од раководството на Манчестер Јунајтед, во клубот не дојдоа позитивните промени, барем ако се суди според вчерашното реми против претпоследниот на табелата, Барнли (2-2).

Не тргна добро натпреварот за гостите и во 13. минута Хевен си постигна автогол со кој Барнли дојде до предност. Тоа беше и единствениот гол во првото полувреме.

Заигра Јунајтед подобро во вториот дел и на сцена стапи Бенјамин Шешко кој првпат од доаѓањето на „Олд Трафорд“ летово постигна два гола на еден натпревар и со погодоците во 50-тата и 60-тата минута донесе целосен пресврт.

Сепак, на крајот тоа не се покажа како доволно за победа бидејќи Ентони со еден убав погодок во 66. минута ги постави конечните 2-2. За Јунајтед ова беше трето реми во низа откако претходно без победник 1-1 ги завршија и средбите со Вулвс и Лидс.