Кирил Стојанов 
Македонската ракометна репрезентација денеска го игра најважниот натпревар на Европското првенство во Хернинг, Данска.
Во третото коло од групната фаза, ќе се соочиме со селекцијата на Романија (18:00).
Македонија на дуелот со Романија влегува во еуфорична атмосфера, по освоениот бод со силната Португалија, каде се прикажавме во одлично светло со квалитетен ракомет и голема борбеност. Сега само треба да ја повториме таа партија и да славиме нова голема победа.
Со евентуална победа против Романија, Македонија ќе биде сигурно трета во групата, а тоа значи дека ќе играме еден бараж за СП, ќе бидеме носител во тој бараж и големи ќе бидат шансите да добиеме поволен противник.
Со победа ќе останеме во игра и за главната фаза и пласман во ТОП 12. Тоа ќе зависи од гол-разликата, па така ќе ни треба убедлива победа, а потоа ќе чекаме убедлива победа и на Данска против Португалија. Вкупната гол разлика во наша корист, за да пројдеме понатаму треба да биде плус 19.
Во спортот чуда се случуваат, а Македонија заслужува да се случи мало ракометно чудо.
