ЈАКИМОВСКИ ОДЛИЧЕН ПРОТИВ ЕВРОЛИГАШОТ ВИРТУС

Тренто си замина од „Сегафредо Арена“ со огромна победа, а Андреј Јакимовски повторно беше еден од играчите што ја направија разликата. Македонскиот кошаркар одигра уште еден одличен натпревар за италијанскиот состав.

Иако домаќинот влезе во мечот како апсолутен фаворит и со голема самодоверба по европскиот подвиг против Монако, гостите од Тренто не покажаа респект. Напротив, одиграа дисциплинирано, трпеливо и максимално фокусирано – токму колку што беше потребно за да се падне великанот.

Јакимовски ја заврши вечерта со 12 поени и шест скокови, но бројките не го кажуваат целосно неговото влијание. Во моментите кога натпреварот се кршеше, Македонецот одигра одбрана за учебник, украде топка на 11 секунди до крајот, а веднаш потоа следеше тројката што го замолкна Болоња и ја донесе победата за Тренто.