РЕАЛ ЗАКАЖА „ЕЛ КЛАСИКО“ ЗА ТРОФЕЈОТ ВО СУПЕРКУПОТ

Реал Мадрид обезбеди пласман во финалето на шпанскиот Суперкуп, каде ќе се соочи со големиот ривал Барселона, откако во полуфиналниот дуел одигран во Саудиска Арабија славеше над Атлетико Мадрид со 2-1.

„Кралевите“ беа поконкретниот тим во динамичен и неизвесен натпревар, а предноста ја стекнаа уште на самиот старт. Во 2. минута, Федерико Валверде маестрално погоди од слободен удар и го шокираше градскиот ривал.

Во вториот дел, Реал ја зголеми контролата, а Родриго во 55. минута одлично реагираше во ситуација еден на еден, го надмудри Ле Норман и сигурно реализираше за 2-0.

Атлетико брзо возврати и внесе неизвесност – во 58. минута Симеоне упати прецизен центаршут, а Сорлот со удар со глава го матираше Куртоа. До крајот „јорганџиите“ тргнаа на се или ништо, но Реал умешно се бранеше и преку контранапади ја зачува минималната предност до последниот свиреж.